சத்குருவின் அருளும் ஆன்ம ஞானப் பாதையும்

இறைவன் மீதும் குருவின் மீதும் நாம் வைத்திருக்கும் பக்தி எப்போது ஆட்டம் காணுகிறது? குருவின் உண்மையான நோக்கம் என்ன? ஒரு ஆன்ம சாதகன் எதை நோக்கிப் பயணிக்க வேண்டும் என்பதை விளக்கும் கட்டுரை இது.

                                          

1. எதிர்பார்ப்பும் ஏமாற்றமும் :-

 

      ஒரு மனிதன் தனது லட்சியம், எதிர்காலம் மற்றும் விருப்பங்கள் குறித்து அதிக எதிர்பார்ப்புகளை வளர்த்துக்கொள்கிறான். அந்த எதிர்பார்ப்புகள் நிறைவேறாதபோது, அவனுள் எதிர்மறை சிந்தனைகள் தலைதூக்குகின்றன. இது அவன் இறைவன் மீது வைத்திருக்கும் பக்தியைச் சற்று அசைத்துப் பார்க்கிறது. "வணங்கினால் இன்பம் கிடைக்கும்" என்று தவறாகப் போதிக்கப்பட்டதே இந்தத் தடுமாற்றத்திற்குக் காரணம்.

 

2. இறைவனே மேலான இன்பம்

      இறைவனை வணங்குவது உலகியல் இன்பங்களைப் பெறுவதற்காக அல்ல; மாறாக, அடைய வேண்டிய இன்பங்களுள் எல்லாம் மேலான இன்பமே இறைவன்தான். அவனை அடைந்த பிறகு, இவ்வுலகில் அடைவதற்கு வேறொன்றும் இல்லை. இந்த உலகத்தையும், இந்தப் பிறவியையும் இறைவனை அறிவதற்கான ஒரு கருவியாகப் பயன்படுத்த வேண்டுமே தவிர, உடைமைகளைப் பாதுகாக்கும் காவலாளியாக இறைவனைக் கருதக்கூடாது.

 

3. உலகியல் பார்வையும் அறியாமையும்

      "இவ்வளவு காலம் குருவை வணங்கியும் உனக்கு ஏன் பொருளாதார முன்னேற்றம் ஏற்படவில்லை?" என்று கேட்பது அறியாமையின் வெளிப்பாடு. குருவை அடைவது என்பது போக விஷயங்களில் (உலகியல் இன்பங்களில்) உச்சத்தைத் தொடுவதற்காக அல்ல; அவரது திருவடிகளைப் பின்பற்றி ஆத்ம ஞானம் பெறுவதற்காகவே என்பதைச் சீடர்கள் அறிவார்கள்.

 

 

4. குருவின் கருணையும் சீடனின் அனுபவமும்

 

    இந்த உலகமே இறைத்தன்மைக்கு எதிராகத் திரண்டாலும், ஒரு மெய்யான சீடன் குரு காட்டிய வழியிலிருந்து விலக மாட்டான். அவனுக்குக் கிடைத்த ஆத்ம அனுபவம் அத்தகையது. வாழ்க்கையில் எத்தனை புயல்கள் வந்தாலும், குருவின் அனுகிரகம் அவனை அந்தப் புயல்களை எதிர்கொள்ளச் செய்து, இறுதியில் 'பரமானந்தம்' எனும் நிலையை அடையச் செய்யும்.

 

5. பிரபஞ்சத்தின் தாய்மை உள்ளம்

      கடல் அலைகளைப் போல இன்பமும் துன்பமும் மாறி மாறி வருவது வாழ்வின் நிலையாமையை நமக்கு உணர்த்துகிறது. பிரபஞ்சம் எப்போதும் நம்மைத் தாய்மை உணர்வோடு அணுகுகிறது. நமது ஆத்ம ஞானப் பாதைக்கு எது உண்மையிலேயே தேவையோ, அதைச் சரியான நேரத்தில் அது நிறைவேற்றி வைக்கும். குருவருள் என்பது அழியும் பொருள்களோடு ஒப்பிட்டுப் பார்க்க வேண்டிய ஒன்றல்ல.

6. விடாமுயற்சியும் வைராக்கியமும்

      குருவின் அருள் என்பது நம்மைச் சரியான வழியில் செலுத்துவதோடு, உலக நன்மைகளுக்காக நாம் எடுக்கும் முயற்சிகளுக்கு வெற்றியைத் தரும் அனுகிரகமாகவும் இருக்கும். சாஸ்திரங்களையும், குருவையும், ஆன்ம சாதகர்களையும் அணுகி ஆன்மீகத்தின் உண்மையான இலக்கணத்தைத் தெரிந்துகொள்ள வேண்டும். அழியும் உடல் மற்றும் பொருளின் இன்பத்தோடு ஆத்ம ஞானத்தை எடை போடாமல், சிரத்தையோடு குருவருளைப் பற்றிக்கொள்ள வேண்டும்.

---

குரு வாழ்க! குருவே துணை!

                                                                                       

இவண்:

மாதங்கியான் சிவ. உதயகுமார் ✍️